UN SCURDEMU U CORSU

Ne vurebbe in tu me' cantu

Divvi le me' intinzione 

Un scurdemu mai lu corsu

Nè in parolle, nè in canzone

E guardemu lu ricordu 

Ch'hà lasciatu ogni babbone.

A dilla lu veru corsu

Di a so' lingua nun s'inganna

Ne pensu à tante parolle

Quandu cantava minnanna

Ancu filendu la rocca 

O la sera à la capanna.

A tutte quelle cantate

In quellu tempu luntanu

Ch'omu partia in aiuta

A lu coglie di lu granu 

Cuntenti l'omi è le donne

Tutti cu le falce in manu.

Ma oghje tuttu hè cambiatu

Solu conta l'intaressu 

Ognunu pensa à se stessu

E l'altri venenu appressu

Trovanu questa ben fatta

Dicenu ch'hè lu progressu.

Cio chi ci vola à spiegà

Sopratuttu à li zitelli

Stianu à sente lu cuccu

 Lu cantu di li sturnelli

Chi cantanu sempre in corsu

Inseme tutti st'acelli.

Ne cantu lu rusignolu

U merulu è la frisgiona

Ognunu li da un versu

Ma hè la stessa canzona

Chi cantanu l'aria corsa

Raligrendu ogni parsona.

I cignali pè a campagna

U muvrone in la furesta

Intesu lu cantu corsu 

Ognunu di pasce s'arresta

L'ape escenu da u bugnu

E tutte facenu festa.

Quand' ellu sbarca u frustere

O quantu hè smaravigliatu !

Di e nostre belle cuntrate

Stà à sente lu parlatu

Va à vede à Monte Cintu

Cu lu Capu Tafunatu.

Quelli chi m'avete intesu

Pensu ùn l'avete da scurdà

E quandi vo' avete figlioli

Ma la prima cosa à fà

Amparateli lu corsu 

A parlallu cu fiertà.

Dominicu Leca

Plus de textes