-
Lamentu di u pastore
A notte fala serena
À lu stazzu addurmintitu
Si disceta la mio pena
Di vive com'è un rimitu
Da l'auturnu à lu veranu
Monte, fiuminale è pianu.
Muntu aghju le mio caprelle
È lu mio latte culatu
Lavatu le mio tinelle
Pane è casgiu aghju manghjatu
Di seculu in seculore
Ripastu di lu pastore
Cusì longhe le sirate
In capanna fumicosa
Quanti sonnii è pinsate
Chì vanu versu la sposa
Tristamente m'addurmentu
Core accesu è focu spentu
Appena spunta l'albore
Si principia la ghjurnata
Nulla si lascia trascorre
Perchè hè sempre malannata
È cusì di tondu in tondu
Ciò ch'hè in cima piglia fondu
O chì mistieru mischinu
Di curà pecure è capre
Ci hè sicchia è ci hè musinu
Per noi mai nùn s'apre
Un' annatone cumpletta
Sopra à trè, duie so discetta
E campive sò sparite
Regna la machja pertuttu
E lamaghje sò surtite
Anu tombu arburu è fruttu
Ind'a campagna sculurita
Ùn ci hè più segnu di vita.
Scrive vogliu à lu guvernu
Ch'ellu pigli un arrestu
Perchè dolce sia l'invernu
È lu veranu aderbatu
Ch'ellu pigli le misure
Contru à le nostre sciagure.
Ch'ellu dia passaportu
À la cungregazione
Tutti ci accusanu à tortu
D'incendii, in tutta stagione
D'avanza cù l'avucatu
U pastore hè cundannatu
A capra prestu sparisce
Si ne more lu capraghju
Ognunu lu maladisce
Cù u fratellu pecuraghju
Tutt'è dui, taccu taccu,
Simu ind'u listessu saccu.
Maladiscu lu prugressu
L'inghjustizia, lu rimore
Tuttu mena è corre appressu
À lu poveru pastore
Da la pieghja à la muntagna
Sò per tutti una macagna
Lasciu dì perchè mi piace
Ascoltu ma nulla sentu
Lasciu stà u ben chì ghjace
Mi stò cù lu me turmentu
Accant'à le mio caprelle
Liberu sò com'è elle.
Ghjuvanni Maestrali - 1961- U Muntese
1 commentaire